الجمعة , سبتمبر 21 2018

نصائح لبشره مثاليه في الشتا

طبعا احلى حاجة في الشتا الميه السخنة لكن دي اكتر حاجة ممكن تضر بشرتك وتخليها جافة, علشان كده الافضل انك تستخدمي الميه الفاترة او الدافية علشان تحافظي على الزيوت الطبيعية اللي بتفرزها البشرة وبتغذيها.

اتبعي النصائح الاتيه لبشره مثاليه في الشتا :

رطبي فورا بعد الغسيل:

البشرة مش بتحتاج بس للترطيب لكن مهم جدا انه يكون الترطيب فوري بعد غسيل البشرة على طول وهي لسه رطبه لان ده بيحافظ اكتر على رطوبتها يعني تخلي الكريم المرطب أو البدي لوشن في الحمام بعد ما تغسلي بشرتك ترطبيها فورا.

اشربي مياه:

تقريبا معظمنا بنشرب كمية ميه اقل في الشتا لان الجسم بيعرق اقل وبالتالي مش بيفقد ميه كتير, لكن احنا ممكن نعوض شرب الميه بالمشروبات السخنة زي الكاكاو والشاي والهوت شوكليت, وممكن تشربي ميه دافية مع ليمون ده مشروب منعش جدا وبيرطب الجسم في نفس الوقت.

احمي بشرتك:

اكيد علشان تحافظي على البشرة لازم تحميها من الجو يعني حاولي في الجو البرد تلبسي جوانتي علشان تحمي ايدك من الجفاف, البسي سكارف علشان تحمي الرقبة, ومتنسيش الصن بلوك لانه مهم في الشتا زي الصيف ممكن يكون في الشتا تأثير الشمس اقل لكن بردو بشرتك بتبقى محتاجة حماية.

متنسيش الترطيب الليلي:

البشرة اثناء الليل بتتجدد و بتستفاد اكتر من منتجات العناية بالبشرة علشان كده الترطيب قبل النوم مهم جدا, رطبي بشرتك قبل النوم بـالكريم المرطب ومتنسيش بردو الجسم والرجل وانسب حاجة ليهم هو البدي لوشن, هتحطيه من بالليل هتصحي الصبح هتلاقي بشرتك مختلفة تماما وهتستمتعي بنعومة بشرتك طول اليوم.

تقشير البشرة:

تقشير البشرة مهم في فصل الشتا علشان نحافظ على نعومتها ونضارتها, وقت تدليك الجسم حبيبات التقشير بتساعد على ازالة الجلد الميت والفرك نفسه بيعزز الدورة الدموية للجسم وبينشط الغدد الليمفاوية لانه بيزود تدفق الدم لسطح الجلد, والمقشر ممكن نستخدمه للبشرة والجسم والايد.

الطريقة: اثناء الشاور وجسمك مبلول وقفي الميه وحطي كمية من السكرب علي جسمك ودلكي في حركة دائرية لمدة 5 دقايق, وبعدين أشطفي جسمك بالميه وبعد الشاور رطبي جسمك بالزيت أو اللوشن.

اهتمي بالخضار و الفاكهة:

زي ما البشرة بتحتاج ترطيب خارجي كمان جسمك محتاج تغذية صحية, دخلي في نظامك الغذائي الاكلات اللي فيها نسبة ميه كبيرة زي التفاح والبرتقال والكيوي, وخضروات زي الكرفس والكوسا والطماطم والخيار والجزر, ولازم تتأكدي ان جسمك بيحصل على الفيتامينات اللي محتاجها زي فيتامين سي, و اوميجا3 , والزنك, لان ده كله بيأثر بشكل ايجابي على البشرة وهيخليها ناعمة و صحية.

غيري غسول البشرة:

البشرة في الشتا ممكن طبيعتها تتغير وبتبقى محتاجة منتجات ترطبها بشكل اكبر, علشان كده لو انتي بتستخدمي نوع غسول معين في الصيف ممكن تغيريه في الشتا وتختاري الانواع اللي فيها مكونات مرطبة اكتر باللبن أو الزبادي, وبنأكد تاني على الترطيب بعد تنضيف البشرة بالغسول نستخدم كريم ترطيب مباشرة بعد غسل البشرة وكل ما نعرض بشرتنا للميه نرطبها بالكريم.

استخدمي الماسكات المرطبة:

حاولي انك تستخدمي الماسكات الطبيعية المرطبة للبشرة خلال فترة الشتا, وممكن تستخدمي مكونات زي الافوكادو وزيت الزيتون واللبن وزيت الجوجوبا وزيت اللوز والموز وجل الصبار كل الحاجات دي ممكن تخلطي منها مكونين او تلات مكونات مع بعض وتعمليهم كماسك للبشرة سيبيه من 10 – 30 دقيقة وبعدين اغسليه بميه دافية ورطبي البشرة بالكريم بعدها.

اتجنبي أي حاجة ممكن تسبب حساسية أو تهيج لبشرتك:

زي ما قولنا في كلامنا في النقط اللي فاتت اننا لازم نختار المنتجات بتاعة البشرة بعناية جدا علشان نحافظ عليها ونديها العناية اللازمة وكمان علشان منعرضش البشرة لاي تهيج او حساسية نحاول نختار المنتجات المضمونة لأن البشرة في الشتا بتبقي حساسة أكتر بكتير من باقي فصول السنة , كمان اختيارك للقماش اللي بيحتك بجلدك مباشرة مهم جدا يعني مثلا فيه بنات ممكن يكون عندها حساسية من الصوف, وقتها يفضل إنك تبدلي السكارف الصوف بقطن أو إنك تلبسي توب قطن تحت البلوفر أو ال coat الصوف بتاعك علشان تحمي بشرتك ومتعرضيهاش للحساسيه .

عن esraa

شاهد أيضاً

خشونة البشره

تخلصي من الجلد الميت وخشونة الجلد بالشاي والعسل

هل لديكي جلدا ميتا في بشرتك او تعانين من الخشونه , جميلتي تخلصك من هذه ...

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *